ആസിഫ് അലി, അമലപോള്‍ കേന്ദ്ര കഥാപാത്രങ്ങളായ 'ലെവല്‍ ക്രോസ്' എന്ന ചിത്രത്തിൻറെ തിരക്കഥ മോഷൻ പിക്ച്ചർ ആർട്‌സ് ആൻഡ് സയൻസ് ലൈബ്രറിയില്‍ ഇടം പിടിച്ചു. അഭിഷേക് ഫിലിംസ് നിർമ്മിച്ച്‌ നവാഗതനായ അർഫാസ് അയൂബ് സംവിധാനം ചെയ്‌ത 'ലെവല്‍ ക്രോസ്' മികച്ച പ്രേക്ഷക പ്രതികരണം ലഭിച്ച സിനിമയായിരുന്നു. ഈ ചിത്രത്തില്‍ നടൻ ഷറഫുദ്ദീനും മികച്ചൊരു കഥാപാത്രത്തെ അവതരിപ്പിച്ചിട്ടുണ്ട്.അക്കാഡമി ഓഫ് മോഷൻ പിക്ചേഴ്‌സിൻറെ ലൈബ്രറിയിലേക്ക് ലെവല്‍ ക്രോസ് ചിത്രത്തിൻറെ തിരക്കഥയും തെരഞ്ഞെടുക്കപ്പെട്ടതോടെ മലയാള സിനിമയുടെ ചരിത്രത്തില്‍ ചിത്രം തിളക്കമാർന്ന നേട്ടം കൈവരിക്കുകയാണ്. രണ്ടാഴ്‌ച മുൻപ് ക്രിസ്‌റ്റോ സംവിധാനം ചെയ്‌ത 'ഉള്ളൊഴുക്ക്' എന്ന ചിത്രത്തിൻറെ തിരക്കഥയും അക്കാഡമി ഓഫ് മോഷൻ പിക്ചേഴ്‌സിൻറെ ലൈബ്രറിയിലേക്ക് തെരഞ്ഞെടുക്കപ്പെട്ടിരുന്നു. ഇത് ആദ്യമാണ് ഇന്ത്യൻ സിനിമ ചരിത്രത്തില്‍ വളരെ ചുരുങ്ങിയ കാലയളവില്‍ ഒരേ മേഖലയിലെ രണ്ട് ചിത്രങ്ങള്‍ അക്കാഡമി ഓഫ് മോഷൻ പിക്ചേഴ്‌സിൻറെ ലൈബ്രറിയിലേക്ക് തിരഞ്ഞെടുക്കുന്നത്. ചലച്ചിത്ര പ്രവർത്തകർക്കും വിദ്യാർഥികള്‍ക്കും ഗവേഷണ ലൈബ്രറികളില്‍ സൂക്ഷിച്ചിരിക്കുന്ന ഇത്തരം തിരക്കഥകള്‍ പഠന വിധേയമാക്കാം. ലോകത്തിലെ വിവിധ രാജ്യങ്ങളിലെ വിവിധ ഭാഷകള്‍ ഉള്ള സിനിമകളില്‍ മികച്ചത് എന്ന തരത്തില്‍ തിരഞ്ഞെടുക്കപ്പെടുന്ന ചിത്രങ്ങളുടെ തിരക്കഥകളാണ് ഇത്തരത്തില്‍ അക്കാദമി ഓഫ് മോഷൻ പിച്ചേഴ്‌സ് ശേഖരത്തില്‍ സൂക്ഷിക്കാറുള്ളത്. ഇംഗ്ലീഷ് ഭാഷയില്‍ പി ഡി എഫ് രൂപത്തിലാണ് തിരക്കഥ ലൈബ്രറിയിലേക്ക് സമർപ്പിക്കേണ്ടത്.