തൃശൂർ : കൂർക്കഞ്ചേരി കുറുപ്പം റോഡ് കോണ്‍ക്രീറ്റ് നിർമാണ പ്രവൃത്തികളുടെ നാലാം ഘട്ട പ്രവർത്തനങ്ങൾ ആരംഭിക്കുന്നതിനാൽ ഇന്ന് മുതൽ നിർമാണം കഴിയുന്നതുവരെ നഗരത്തിൽ ഗതാഗതം പരിഷ്കരിക്കുമെന്ന് ട്രാഫിക് പോലീസ് അറിയിച്ചു. ദിവാൻജിമൂല ഭാഗത്തു നിന്നും സ്വരാജ് റൗണ്ടിലേക്ക് പോകേണ്ട ചെറു വാഹനങ്ങൾ ചെട്ടിയങ്ങാടി ജംഗ്ഷനിൽ നിന്ന് നേരെ പോസ്റ്റോഫീസ് റോഡു വഴി എം ഒ റോഡിലെത്തി റൗണ്ടിലേക്ക് പ്രവേശിക്കണം. ഈ ദിവസങ്ങളിൽ എംഒ റോഡ് ഭാഗത്തു നിന്നും ചെട്ടിയങ്ങാടി ഭാഗത്തേക്ക് വാഹനങ്ങൾക്ക് പ്രവേശനം ഉണ്ടായിരിക്കുന്നതല്ല. ദിവാൻജിമൂല ഭാഗത്തു നിന്നും റൗണ്ടിലേക്ക് പോകേണ്ട സ്വകാര്യ ബസുകൾ ചെട്ടിയങ്ങാടി ജംഗ്ഷന് മുൻപുള്ള ദ്വാരക ഹോട്ടൽ ജംഗ്ഷനിൽ നിന്നും ഇടത്തോട്ട് തിരിഞ്ഞ് മാരാർ റോഡു വഴി സർവീസ് നടത്തുന്നതിനാൽ ഈ റോഡിൽ നിർമാണം കഴിയുന്നതു വരെ ദ്വാരക ഹോട്ടൽ ജംഗ്ഷൻ മുതൽ റൗണ്ട് വരെയുള്ള മാരാർ റോഡ് വണ്‍വെ ആയിരിക്കും. സ്വരാജ് റൗണ്ട്, മണപ്പുറം ജംഗ്ഷൻ, പേൾ റീജൻസി എന്നിവിടങ്ങളിൽ നിന്നും വരുന്ന വാഹനങ്ങൾക്ക് മാരാർ റോഡ് വഴി ദ്വാരക ഹോട്ടൽ ജംഗ്ഷൻ ഭാഗത്തേക്ക് പ്രവേശനം നിരോധിച്ചിട്ടുണ്ട്. മാരാർ റോഡിെൻറയും, പോസ്റ്റോഫീസ് റോഡിന്‍റെയും ഇരു വശങ്ങളിലുമുള്ള വ്യാപാര സ്ഥാപനങ്ങളിലേക്ക് വരുന്ന ചരക്ക് വാഹനങ്ങളിൽ നിന്നും കയറ്റിറക്ക് സംബന്ധമായ പ്രവൃത്തികൾ രാവിലെ എട്ടിന് മുൻപോ രാത്രി ഒൻപതിന് ശേഷമോ നടത്തണം. അല്ലാത്തപക്ഷം കയറ്റിറക്ക് നടത്തുന്ന വാഹനങ്ങൾക്കെതിരെ കർശന നിയമ നടപടികളും സ്വീകരിക്കുമെന്നും പോലീസ് അറിയിച്ചു. മാരാർ റോഡ്, പോസ്റ്റോഫീസ് റോഡ് എന്നിവിടങ്ങളിൽ പ്രവർത്തിക്കുന്ന വ്യാപാര സ്ഥാപനങ്ങളിലേക്ക് വരുന്ന വാഹനങ്ങൾ റോഡിനിരുവശങ്ങളിൽ പാർക്ക് ചെയ്യുന്നതിനും നിരോധനം ഏർപ്പെടുത്തിയിട്ടുണ്ട്.