ഇന്ത്യയും യുഎഇയും തമ്മിൽ ആണവ സഹകരണത്തിന് ഒരു പുതിയ കരാർ ഒപ്പുവച്ചു. ഈ കരാറിൻ്റെ ലക്ഷ്യം, ആണവോർജ്ജ പ്ലാൻറുകളുടെ പ്രവർത്തനത്തിന് പരസ്പര സഹായം നൽകാനാണ്. ഇതടക്കം 5 കരാറുകള്ളിൽ ആണ് അബുദാബി കിരീടാവകാശി ശൈഖ് ഖാലിദ് ബിൻ മുഹമ്മദ് ബിൻ സായിദ് അൽ നഹ്യാൻ്റെ സന്ദർശന സമയത്ത് രണ്ട് രാജ്യങ്ങളും ഒപ്പുവച്ചത്.

      ഇന്ത്യയുടെ പെട്രോളിയം കരുതൽ ശേഖരത്തിൽ പങ്കാളിത്തം വർധിപ്പിക്കുന്നതിനും, അബുദാബി ഓൺഷോർ ബ്ലോക്ക് 1-ൽ നിന്ന് ഇന്ത്യയിലേക്ക് ക്രൂഡ് ഓയിൽ എത്തിക്കുന്നതിനും, ഗുജറാത്തിൽ ഫുഡ് പാർക്ക് വികസിപ്പിക്കാനും ഈ കരാറുകളിൽ പറയുന്നു . പ്രധാനമന്ത്രി നരേന്ദ്ര മോദിയും ശൈഖ് ഖാലിദും ഹൈദരാബാദ് ഹൗസിൽ നടത്തിയ ചർച്ചയിൽ, തന്ത്രപ്രധാന സഹകരണം ശക്തമാക്കാൻ ധാരണയായി. ഇന്ത്യ യുഎഇയിൽ നിന്ന് കൂടുതൽ പ്രകൃതി വാതകവും ക്രൂഡ് ഓയിലും വാങ്ങുന്നതിന് ദീർഘകാല കരാറുകൾക്ക് ഒപ്പുവച്ചു. ഇക്കാര്യം സംബന്ധിച്ച് രാഷ്ട്രപതി ദ്രൗപദി മുർമുവും അബുദാബി കിരീടാവകാശി ശൈഖ് ഖാലിദ് ബിൻ മുഹമ്മദ് ബിൻ സായിദ് അൽ നഹ്യാനും കൂടിക്കാഴ്ച നടത്തി.

           പ്രധാനമന്ത്രി നരേന്ദ്ര മോദിയും ശൈഖ് ഖാലിദും ബഹുമുഖ ബന്ധങ്ങളെക്കുറിച്ചും “പുതിയതും ഉയർന്നുവരുന്ന മേഖലകളിലേക്ക് സമഗ്രമായ തന്ത്രപരമായ പങ്കാളിത്തം വികസിപ്പിക്കുന്നതിൻ്റെ വഴികൾ” ചർച്ച ചെയ്‌തതായി വിദേശകാര്യ മന്ത്രാലയ വക്താവ് രൺധീർ ജയ്‌സ്വാൾ പറഞ്ഞു. അബുദാബി നാഷണൽ ഓയിൽ കമ്പനിയും (ADNOC) ഇന്ത്യൻ ഓയിൽ കോർപ്പറേഷൻ ലിമിറ്റഡും തമ്മിലുള്ള എൽഎൻജി വിതരണത്തിന് 15 വർഷത്തെ കരാർ ഒപ്പുവച്ചു. ADNOCയുടെ ലോവർ-കാർബൺ റുവൈസ് വാതക പദ്ധതിയിൽ നിന്ന് പ്രതിവർഷം ഒരു ദശലക്ഷം മെട്രിക് ടൺ (MMTPA) വാതകം ഇന്ത്യയ്ക്കായി വിതരണം ചെയ്യുന്നതിനാണ് കരാർ. ഊർജ സുരക്ഷ ശക്തിപ്പെടുത്തുന്നതിനായി, ഇതു ഇന്ത്യയുടെ ഒരു വർഷത്തിനുള്ളിൽ ഒപ്പുവെച്ച മൂന്നാമത്തെ കരാറാണ്. 

       ഐഒസിഎല്ലും ഗെയ്‌ലും, യഥാക്രമം 1.2 എംഎംടിപിഎയും 0.5 എംഎംടിപിഎയുമായ ദീർഘകാല കരാറുകളിൽ ADNOCയുമായി ഒപ്പുവച്ചിട്ടുണ്ട്. ആണവ നിലയങ്ങളുടെ പ്രവർത്തനത്തിലും പരിപാലനത്തിലും ഇന്ത്യയിൽ നിന്നുള്ള ആണവ ഉൽപന്നങ്ങളും സേവനങ്ങളും ഉറവിടങ്ങളും പര്യവേക്ഷണ സംവിധാനങ്ങളും സംബന്ധിച്ച് ആണവ നിലയങ്ങളിൽ പ്രവർത്തിക്കുന്നതിനുള്ള ധാരണാപത്രം ന്യൂക്ലിയർ പവർ കോർപ്പറേഷൻ ഓഫ് ഇന്ത്യ ലിമിറ്റഡും (എൻഎൻപിസിഐഎൽ) എമിറേറ്റ്സ് ന്യൂക്ലിയർ എനർജി കോർപ്പറേഷനും (ഇഎൻഇസി) തമ്മിൽ ഒപ്പുവച്ചു.