അഴിമതിയില്‍ മുങ്ങിക്കുളിച്ച എല്‍ഡിഎഫ് സര്‍ക്കാരിൻ്റെ അവസാന മണിമുഴങ്ങിക്കഴിഞ്ഞെന്നും അതിനുള്ള തുടക്കമാണ് സെക്രട്ടറിയേറ്റിലേക്ക് കോണ്‍ഗ്രസ് നടത്തുന്ന പ്രതിഷേധ മാർച്ച് എന്നും മാർച്ച് ഉദ്ഘാടനം ചെയ്തു കൊണ്ട് എഐസിസി ജനറല്‍ സെക്രട്ടറി ദീപദാസ് മുന്‍ഷി പറഞ്ഞു. ഒന്നാം പിണറായി സർക്കാറിൻ്റെ കാലത്തുള്ള അതേനിലപാടുകൾ തന്നെയാണ് ഇപ്പോഴും തുടരുന്നത് എന്നും ക്രിമിനലുകളായ ഉദ്യോഗസ്ഥരെ വരെ മുഖ്യമന്ത്രിയും പാർട്ടിയും സംരക്ഷിക്കുകയാണെന്നും ഇതുപക്ഷത്തിൻ്റെ ഭരണത്തിൽ കേരളം വളരെ അപകടകരമായ അവസ്ഥയിലൂടെയാണ് കടന്നു പോകുന്നത് എന്നും ദീപദാസ് മുന്‍ഷി പറഞ്ഞു.

       ഗതികെട്ട പിണറായി ഭരണം അവസാനിപ്പിക്കാനുള്ള സമരമുഖത്തേക്ക് കടക്കുകയാണ് യുഡിഎഫ് എന്നും അടുത്ത നിയമസഭ തിരഞ്ഞെടുപ്പോടെ ഈ പോരാട്ടത്തിന് ഫലം ഉണ്ടാകും എന്നും അദ്ദേഹം പറഞ്ഞു. സിനിമകളിലെ വില്ലനെ പോലെ പെരുമാറുന്ന എഡിജിപി അജിത് കുമാർ നടത്തുന്ന എല്ലാ നിയമവിരുദ്ധ പ്രവർത്തികൾക്കും മുഖ്യമന്ത്രിയും പാർട്ടിയും സംരക്ഷണം ഒരുക്കുന്നു. ഭരണപക്ഷത്തെ ഒരു എംഎൽഎ തന്നെ ഇതിനെതിരെ പരസ്യമായി രംഗത്ത് വരുന്നത് പിണറായി സർക്കാരിന്റെ ഗതികേട് തുറന്നുകാണിക്കുന്നു എന്നും അദ്ദേഹം പറയുകയുണ്ടായി.