മുടിയ്ക്ക് നല്ല രീതിയിലുള്ള സംരക്ഷണം ഉറപ്പാക്കേണ്ടത് വളരെ പ്രധാനമാണ്. വരണ്ടതും എണ്ണമയമുള്ളതും സാധാരണവുമായ വ്യത്യസ്തമായ മുടിയിഴകളാണ് പലർക്കുമുള്ളത്. ഒരു പ്രായമാകുമ്പോൾ പലരും നേരിടുന്ന പ്രധാന പ്രശ്നങ്ങളിലൊന്നാണ് മുടികൊഴിച്ചിൽ. ഇത് മാറ്റാൻ എളുപ്പത്തിൽ വീട്ടിൽ തന്നെ ചെയ്യാൻ കഴിയുന്ന ഹെയർ മാസ്കുകൾ വളരെ നല്ലതാണ്. നാച്യുറൽ രീതിയിൽ ചെയ്യുന്ന ഇത്തരം ഹെയർ മാസ്കുകൾ മുടിയിഴകൾക്ക് ആരോഗ്യവും ബലവും നൽകാൻ സഹായിക്കും.

കറ്റാർവാഴ

മുടിയ്ക്കും ചർമ്മത്തിനും ഏറ്റവും അനുയോജ്യമായതാണ് കറ്റാർവാഴ. ഇതിൽ അടങ്ങിയിരിക്കുന്ന പല ഗുണങ്ങളും മുടിയെ വേരിൽ നിന്ന് സംരക്ഷിക്കാൻ ഏറെ സഹായിക്കുന്നതാണ്. മുടിയ്ക്ക് ആവശ്യമായ ജലാംശം നൽകാനും മുടിയിഴകളെ ബലത്തോടെ വയ്ക്കാനും മുടികൊഴിച്ചിൽ മാറ്റാനും കറ്റാർവാഴ നല്ലതാണ്. മുടിയുടെ വരൾച്ച, മുടിയിഴകൾ പൊട്ടി പോകുന്നത്, താരൻ പ്രശ്നങ്ങൾ, ചൊറിച്ചിൽ എന്നിവയെല്ലാം വേഗത്തിൽ ഇല്ലാതാക്കാൻ കറ്റാർവാഴ സഹയിക്കാറുണ്ട്.

വെളിച്ചെണ്ണ

മുടിയ്ക്ക് വളരെ നല്ലതാണ് വെളിച്ചെണ്ണ. മുടി വളർത്താൻ പണ്ട് കാലം മുതലെ എല്ലാവരും ഉപയോഗിക്കുന്നതാണ് വെളിച്ചെണ്ണ. ഇതിൽ അടങ്ങിയിരിക്കുന്ന ഫാറ്റി ആസിഡ് മുടിയ്ക്ക് നല്ല ജലാംശം നൽകാനും മുടിയെ മൃദുവാക്കാനും ഏറെ സഹായിക്കാറുണ്ട്. അതുപോലെ ഇതിൽ അടങ്ങിയിരിക്കുന്ന ലോറിക് ആസിഡ് തലയോട്ടിയിൽ പറ്റി പിടിച്ചിരിക്കുന്ന താരൻ പോലെയുള്ള പൊടി പടലങ്ങളെയും ഇല്ലാതാക്കാൻ സഹായിക്കും. വെറുതെ വെളിച്ചെണ്ണ തേയ്ക്കുന്നതും അല്ലെങ്കിൽ നന്നായി കാച്ചി തേയ്ക്കുന്നതും മുടിയുടെ അഴക് കൂട്ടാൻ ഏറെ സഹായിക്കാറുണ്ട്.

പായ്ക്ക് തയാറാക്കാൻ

വളരെ സിമ്പിളാണ് ഈ പായ്ക്ക് തയാറാക്കാൻ ഇതിനായി വെറും രണ്ട് ചേരുവകൾ മാത്രമാണ് ആവശ്യമായിട്ടുള്ളത്. ആദ്യം ഒരു ചെറിയ പാത്രത്തിൽ 2 ടേബിൾ സ്പൂൺ കറ്റാർവാഴ എടുക്കുക. ഇനി ഇതിലേക്ക് അൽപ്പം വെളിച്ചെണ്ണ കൂടി ചേർക്കാം. ഈ മിശ്രിതം നല്ലൊരു പേസ്റ്റാകുന്നത് വരെ നന്നായി അടിച്ച് എടുക്കുക. നല്ലൊരു ക്രീമി ടെക്സചർ കിട്ടി കഴിയുമ്പോൾ അത് മുടിയിലും വേരിലുമൊക്കെ തേച്ച് പിടിപ്പിക്കാവുന്നതാണ്. അതിന് ശേഷം 20 മിനിറ്റ് കഴിഞ്ഞ് മുടി കഴുകി വ്യത്തിയാക്കി എടുക്കുകയും ചെയ്യാം.